نووروز بایرامی مراسیم لرینده ، خالقیمیزین اؤنم وئردیگی ان بؤیوك عونصورلردن بیری چرشنبه‌لردیر. آذربایجان تورك‌لری‌نین خالق تقویمینه گؤره، قیش فصلی‌نین آخیرینجی آیی بوز آیی دیر. بوز آیی فئورال ین 22- دن مارت آیی‌نین 21 نه قدر داوام ائدیر. بو آیدا هاوا‌لار تئز تئز بوزاریر، گاه یاغیش یاغیر، گاه دا گون چیخیر. بونا گؤره ده اولو بابا‌لاریمیز بوز آیی دؤرد چرشنبه‌یه بؤلوب‌لر. آنلاییشا گؤره ، اولو تانری ایلك اینسانی  یاراداركن تورپاغا سو قاتیب ، پالچیق‌دان اینسان شكلی دوزه لدیب ، سونرا اونا ایستی نفس وئریب ، باهاردا چیچكلری ، اوت لاری ، آغاج‌لاری اویا‌دان یئل‌لره امر وئریب اونو جانلاندیریب . ائله بو سبب دن ، یعنی بو دؤرد عونصوردن یاراندیغی اوچون اینسان همین دؤرد عونصورو موقدس لشدیریب ، هره ‌سینه بیر گون آییریب . بئله‌جه بو چرشنبه‌لر سو، اود ، یئل ، تورپاق چرشنبه‌سی كیمی قئید ائدیلیب.

بیرینجی سو چرشنبه‌سی آدلاندیریلیردی . یعنی باهارا دوغرو چای‌لارین آزاجیق بوز باغلایان یئرلری ارییب چای‌لارا تؤكولور . تورپاق یاواش یاواش ایسلانماغا باشلاییر . قیزلار بولاق‌لاردان سرین، شیرین سو گتیره ردیلر، ائوین اطرافینا چیله ییردیلر، اوزلرینی یویاردیلار.

ایكینجی‌سی اود چرشنبه‌سی آدلانیر. اونا گؤره كی ، باهارا دوغرو گونش یاواش یاواش تورپاغی قیزدیریر، ایسیندیریر، اونو یاراتماق اوچون حاضیرلاییر. اود چرشنبه ‌سینده تونقال‌لار قالایاردی‌لار . هر عائله عضوونون آدینا بیر ده نه شام یاندیراردیلار. خونچا‌لار دوزه لده ردیلر .

اوچونجوسو یئل چرشنبه‌سی‌دیر. بعضی بؤلگه ‌لریمیزده چوخ عزیز توتولور. یعنی یئل آرتیق آزاجیق اویانمیش تورپاغی ، تزه‌ جه گلمیش یازا حسرت گول ‌لری ترپه‌ دیر، چیچك له نن آغاج‌لاری یئلله‌دیر.

آخیرینجی‌سی تورپاق چرشنبه‌سی‌دیر. تورپاغی آنا طبیعت  سو ایله ایسلاتدی ، گونش له ایسیتدی ، اونو یاراتماغا حاضیرلادی. اونا گؤره ده ایلك یاز اكینینی خیشلا كوتانلا محض تورپاق چرشنبه‌سی گونونده باشلایاردی‌لار. ننه ‌لریمیز "سمنی، ساخلا منی، ایلده گؤیرده ره م سنی"  دئییب بوغدا ایسلاداردی‌لار.

 

قایناق : http://azarmahni.blogfa.com/post-113.aspx

چهارشنبه 24 اسفند 1390
بؤلوملر : مقاله لر,